ශ්රී ලංකා මුහුදු සීමාවට අනවසරයෙන් ඇතුළු වී නීති විරෝධී ලෙස මසුන් ඇල්ලීමේ නිරත වූ බවට සැක කෙරෙන ඉන්දීය ධීවරයින් නව දෙනෙකු සහ ඔවුන් ගමන් කළ ධීවර යාත්රාවක් ශ්රී ලංකා නාවික හමුදාව විසින් අත්අඩංගුවට ගෙන තිබේ.
තලෙයිමන්නාරම උරුමාලෙයි තුඩුවට ඔබ්බෙන් වූ මුහුදු ප්රදේශයේදී අගෝස්තු 12 වැනිදා නාවික හමුදාව සිදුකළ මෙහෙයුමකදී මෙම අත්අඩංගුවට ගැනීම සිදුකර ඇත.
අදාළ ධීවර යාත්රාව ජාත්යන්තර මුහුදු සීමා මායිම (IMBL) උල්ලංඝනය කරමින් ශ්රී ලංකා මුහුදු සීමාවට ඇතුළු වී මුහුදු පත්ල ඇදගෙන යමින් මසුන් ඇල්ලීමේ ක්රමයක් වන bottom trawling ක්රමය භාවිත කරමින් මසුන් ඇල්ලීමේ නිරතව සිටි බව නාවික හමුදාව සඳහන් කළේය.
අත්අඩංගුවට ගත් ධීවරයින් නව දෙනා සහ ධීවර යාත්රාව වැඩිදුර නීතිමය කටයුතු සඳහා මන්නාරම ධීවර පරීක්ෂකවරයා වෙත භාරදීමට නියමිතය.
මන්නාරම් දූපත සහ ආදම්ගේ පාලම ආශ්රිත ගල්ෆ් ඔෆ් මන්නාරම් පරිසර පද්ධතිය සාගර ජෛව විවිධත්වය සහ සංරක්ෂණය සඳහා ඉහළ ප්රමුඛතාවක් ලබාදී ඇති ප්රදේශයක් බව නාවික හමුදාව පවසයි.
එම ප්රදේශය ධීවර කළමනාකරණ සහ පාරිසරික ආරක්ෂණ රෙගුලාසි යටතේ පාලනය වන බවද නාවික හමුදාව වැඩිදුරටත් සඳහන් කළේය.
