ශ්‍රී ලංකාවේ ජර්මානු තානාපති කාර්යාලය සඳහන් කළේ, ධීවර හා ජලජ සම්පත් දෙපාර්තමේන්තුව සහ DVV International Sri Lanka ආයතනය එක්ව, කොළඹ නාරාහේන්පිට පිහිටි National Seafarers ආයතනයේදී දිගුදැල් ධීවර යාත්‍රා කාර්ය මණ්ඩල සාමාජික පුහුණු වැඩසටහනේ පළමු කණ්ඩායම සඳහා පුහුණුව ආරම්භ කර ඇති බවයි.
මෙම වැඩසටහනට ප්‍රායෝගික පුහුණුව සහ සමාකරණ පුහුණු සැසි ඇතුළත් වන අතර, ඒවා දකුණු සමුද්‍රීය පුහුණු ආයතනයේදී පැවැත්වේ. දිගුදැල් ධීවර කර්මාන්තයේ රැකියාවල නිරත වීමට අවශ්‍ය මූලික කුසලතා සහ දැනුම ලබාදීම මෙහි අරමුණයි.
ධීවර යාත්‍රාවක සේවය කිරීමේදී පැවරෙන වගකීම් ඇතුළුව මුහුදේ ජීවිතය පිළිබඳ සහභාගිවන්නන්ගේ අවබෝධය වැඩිදියුණු කිරීම කෙරෙහි ද මෙම පුහුණුවේදී විශේෂ අවධානයක් යොමු කෙරේ.
කර්මාන්තයට අදාළ කුසලතාවලින් තරුණ තරුණියන් සන්නද්ධ කිරීමත්, ශ්‍රී ලංකාවේ ධීවර ක්ෂේත්‍රයේ රැකියා වෙත පිවිසීමට නව මංපෙත් විවෘත කිරීමත් මෙම වැඩසටහනේ අරමුණ බව ජර්මානු තානාපති කාර්යාලය සඳහන් කළේය.
මෙම වැඩසටහන යටතේ ඉදිරියේදී තවත් පුහුණු කණ්ඩායම් ආරම්භ කිරීමට අපේක්ෂා කෙරෙන අතර, ඒ හරහා ධීවර කර්මාන්තයේ වෘත්තීය අවස්ථා සොයා යන තවත් තරුණ තරුණියන් පිරිසකට පුහුණුව ලබාගැනීමට අවස්ථාව සැලසෙනු ඇත.
