ශ්රී ලංකා ක්රිකට් ක්රීඩක චමික කරුණාරත්නට පීතෘත්වය සම්බන්ධ නඩුවකදී DNA පරීක්ෂණයක් සඳහා රුධිර සාම්පලයක් ලබාදෙන ලෙස නියෝග කරන ලෙස කළ ඉල්ලීම කොළඹ දිසා අධිකරණය විසින් ප්රතික්ෂේප කිරීමට එරෙහිව කොළඹ සිවිල් අභියාචනා මහාධිකරණය වෙත අභියාචනයක් ඉදිරිපත් කර තිබේ.
DNA පරීක්ෂණයක් පැවැත්වීමට ප්රමාණවත් කරුණු ඉදිරිපත් කර නොමැති බව පවසමින් කොළඹ දිසා අධිකරණය අදාළ ඉල්ලීම ප්රතික්ෂේප කර තිබුණි.
ගුවන් නියමුවරියක වන රසිකා සෙව්වන්දි විසින් මෙම නඩුව පවරා ඇති අතර, තම දරුවාගේ පියා චමික කරුණාරත්න බවට ප්රකාශයක් ලබාදෙන ලෙස ඇය අධිකරණයෙන් ඉල්ලා තිබේ.
තම පෙත්සම මගින් සෙව්වන්දි අධිකරණයෙන් ඉල්ලා ඇත්තේ චමික කරුණාරත්න දරුවාගේ පියා ලෙස ප්රකාශයට පත් කරන ලෙසත්, ඒ අනුව ඔහුගේ නම පියා ලෙස සඳහන් කරමින් උප්පැන්න සහතිකයක් නිකුත් කිරීමට රෙජිස්ට්රාර් ජනරාල්වරයාට නියෝග කරන ලෙසත්ය.
2023 වසරේ පමණ සිට තමන් සහ කරුණාරත්න අතර සබඳතාවක් පැවති බවත්, තමන් ගැබ් ගැනීමෙන් අනතුරුව ඔහු පීතෘත්වය පිළිගැනීම ප්රතික්ෂේප කළ බවත් ඇය චෝදනා කරයි.
කෙසේ වෙතත්, චමික කරුණාරත්න මෙම චෝදනාව අඛණ්ඩව ප්රතික්ෂේප කර ඇති අතර DNA පරීක්ෂණයකට පෙනී සිටීමටද විරෝධය පළ කර තිබේ.
