විවෘත කිරීමෙන් අනතුරුව නායකයන් දෙදෙනා නව මෙට්‍රෝ දුම්රියේ එකට ගමන් කරමින් මගීන් සහ නැගී එන ව්‍යාපාරික ආරම්භක සමාගම්වල නියෝජිතයන් සමඟ ද අදහස් හුවමාරු කරගෙන ඇත.
චෙන්නායි නගරයේ වේගයෙන් සංවර්ධනය වන බටහිර තදාසන්න ප්‍රදේශ සහ නගර මධ්‍යය අතර ප්‍රවාහන සම්බන්ධතාව වැඩිදියුණු කිරීමට මෙම නව දුම්රිය මාර්ග කොටස උපකාරී වනු ඇතැයි අපේක්ෂා කෙරේ. එමගින් මගීන්ට වඩාත් වේගවත් සහ පහසු ගමන් පහසුකම් සැලසෙනු ඇත.
මෙම ව්‍යාපෘතියේ විශේෂත්වයක් වන්නේ කිලෝමීටර් 3.7ක දිගින් යුත් ද්විත්ව තට්ටු ප්‍රවාහන මාර්ග කොටසයි. සීමිත නාගරික ඉඩකඩක ප්‍රවාහන යටිතල පහසුකම් ස්ථාපිත කිරීම සඳහා එය සැලසුම් කර තිබේ.
මෙට්‍රෝ මාර්ගය විවෘත කිරීම පිළිබඳ සමාජ මාධ්‍ය ඔස්සේ තොරතුරු බෙදාගත් අගමැති මෝදි, දෛනික මගීන්ට එමගින් ලැබෙන ප්‍රතිලාභ සහ චෙන්නායි නගරයේ පුළුල් වෙමින් පවතින ප්‍රවාහන ජාලයේ වැදගත්කම අවධාරණය කර ඇත.
එම දුම්රිය ගමනේදී හමුවූ ආරම්භක ව්‍යාපාර නියෝජිතයන්ගේ උනන්දුව සහ උද්‍යෝගය ද අගමැතිවරයාගේ පැසසුමට ලක්ව තිබේ.
චෙන්නායි මෙට්‍රෝ ව්‍යාපෘතියේ දෙවැනි අදියරේ පුළුල් කිරීමේ වැඩපිළිවෙළේ කොටසක් ලෙස මෙම විවෘත කිරීම සිදු කර ඇත. නගරය පුරා පොදු ප්‍රවාහන සම්බන්ධතාව වැඩිදියුණු කිරීම සහ ගමනාගමන දුෂ්කරතා අවම කිරීම එහි අරමුණයි.
ඉන්දීය රුපියල් කෝටි 4,900ක වියදමින් ඉදිකර ඇති කිලෝමීටර් 15කට ආසන්න මෙම උස් මාර්ග කොටසට දුම්රිය ස්ථාන 11ක් ඇතුළත් වේ. එය චෙන්නායි මෙට්‍රෝ දෙවැනි අදියරේ සිව්වැනි මාර්ග පථයේ කොටසකි.
ඉරිදා පස්වරුවේ සිට මගී ප්‍රවාහන සේවා ආරම්භ කර ඇති අතර, ඔක්තෝබර් 12 වැනි සඳුදා සිට දිනපතා පෙරවරු 7 සිට රාත්‍රී 9 දක්වා දුම්රිය ධාවනය කිරීමට නියමිතය.
