ආර්ථික පීඩනය සහ ඖෂධ සැපයුම් යාන්ත්රණය කඩාකප්පල් වීම හේතුවෙන් අත්යාවශ්ය ඖෂධ කිහිපයක හිඟයකට ශ්රී ලංකාව මුහුණ දී සිටින බව වෛද්ය වෘත්තීය සමිති නියෝජිතයෙක් අනතුරු අඟවා තිබේ.
වෛද්ය සහ සිවිල් අයිතිවාසිකම් පිළිබඳ වෛද්ය වෘත්තීය සමිති සන්ධානයේ සභාපති විශේෂඥ වෛද්ය චමල් සංජීව පැවසුවේ රුපියල දිගින් දිගටම අවප්රමාණය වීම සහ උද්ධමනය ඉහළ යාම හේතුවෙන් බාහිර ඖෂධ සැපයුම්කරුවන් නිසි සැපයුම් පද්ධතියක් පවත්වාගෙන යාමට අපොහොසත් වී ඇති බවයි.
ප්රධාන රෝග සඳහා භාවිත කරන ඖෂධ හිඟය හේතුවෙන් බාහිර ඔසුසල්වලින් ප්රතිකාර ලබා ගැනීමට පැමිණෙන රෝගීන් දුෂ්කරතාවට පත්ව ඇති බව ඔහු පැවසීය.
වෛද්ය සංජීව පවසන පරිදි පිළිකා, වකුගඩු, අක්මා රෝගවලින් පෙළෙන රෝගීන් මෙන්ම ශල්යකර්ම සඳහා බලා සිටින සහ බෝ නොවන රෝග සඳහා ප්රතිකාර ලබන රෝගීන් ද ඉන් දැඩි ලෙස පීඩාවට පත්ව සිටිති.
ඇතැම් ඖෂධ ලියාපදිංචි කිරීම ප්රමාද වීම, රජයේ පාලන මිලට ඖෂධ ආනයනය කිරීමට සැපයුම්කරුවන් අකැමැති වීම, ඇමෙරිකානු ඩොලරයට සාපේක්ෂව රුපියලේ අගය සීග්ර ලෙස අවප්රමාණය වීම ඇතුළු කරුණු කිහිපයක් මෙම තත්ත්වයට හේතු වූ බව ඔහු පෙන්වා දුන්නේය.
මේ නිසා ආර්ථික ශක්තියක් නොමැති අය මත විශාල බරක් පටවමින් අධික මිල ගණන් යටතේ පිටරටින් ඖෂධ ආනයනය කිරීමට ඇතැම් රෝගීන්ට සිදු වේ.
මෙම ගැටලුව විසඳීමට බලධාරීන් කඩිනම් පියවර නොගතහොත් සෞඛ්ය සේවා සහ රෝගී සත්කාර දැඩි ලෙස අඩාල විය හැකි බවට වෛද්ය සංජීව අනතුරු ඇඟවීය.
