කොළඹ බම්බලපිටියේ ගාලු පාරේ අනතුරුදායක ලෙස මුදල් සඳහා ඔට්ටු පැදවූ යතුරුපැදිකරුවන් 15 දෙනෙකුට රුපියල් 427,500ක දඩයක් සහ ඔවුන්ගේ රියදුරු බලපත්‍රය මාස 6කට අත්හිටුවීමට කොළඹ රථවාහන අධිකරණය නියෝග කළේය.
බම්බලපිටිය පොලිසිය විසින් මැයි 5 වැනිදා අලුයම මෙම යතුරුපැදිකරුවන් අත්අඩංගුවට ගෙන පොලිස් ස්ථානයට ඉදිරිපත් කිරීමෙන් පසු පොලිස් ඇප මත මුදා හැරියේය. සැකකරුවන් අවුරුදු 20ත් 28ත් අතර වයස්වල පසුවන කොළඹ සහ ඒ අවට ප්‍රදේශවල පදිංචිකරුවන්.
ඔවුන් අත්අඩංගුවට ගැනීමෙන් පසු මෝටර් රථ පරීක්ෂකවරයකු විසින් යතුරුපැදි කිසියම් දෝෂයක් ඇත්දැයි පරීක්ෂා කර ඇත.
අනතුරුව සැකකරුවන් කොළඹ රථවාහන අධිකරණයට ඉදිරිපත් කළ අතර එහිදී ඔවුන්ට දඩ නියම කර තිබේ.
“මෙම යතුරුපැදිකරුවන් නීතිමය ක්‍රියාමාර්ගවලට මුහුණ දුන් පළමු අවස්ථාව මෙය නොවේ. ඔවුන් මීට පෙර අත්අඩංගුවට ගෙන අනතුරුදායක ලෙස පැදවීම සම්බන්ධයෙන් දඩ නියම කර ඇති අතර, ඔවුන්ට දඩ ගෙවන ලෙස අධිකරණය දිගින් දිගටම නියෝග කර ඇත,” උසස් පොලිස් නිලධාරියෙක් පැවසීය.
බම්බලපිටිය පොලිසිය වැඩිදුර පරීක්ෂණ පවත්වයි.
