පාකිස්තානයේදී සත්කාරක පාකිස්තානය සහ එංගලන්තය සමඟ පැවැත්වෙන තුන්කොන් එක්දින තරගාවලිය සඳහා ශ්‍රී ලංකා ක්‍රිකට් ආයතනය ක්‍රීඩකයන් 16 දෙනෙකුගෙන් සමන්විත කණ්ඩායමක් නම් කර තිබේ.
කණ්ඩායමේ නායකත්වය කුසල් මෙන්ඩිස්ට හිමිව ඇති අතර, පැතුම් නිස්සංකද වෛද්‍ය නිෂ්කාශනයට යටත්ව කණ්ඩායමට ඇතුළත් කර තිබේ.
ශ්‍රී ලංකා ක්‍රිකට් ආයතනය සඳහන් කළේ පැතුම් නිස්සංක වෛද්‍ය පරීක්ෂණවලින් ක්‍රීඩා කිරීමට සුදුසු බවට තහවුරු වුවහොත් පමණක් කණ්ඩායම සමඟ පාකිස්තානය බලා පිටත්ව යන බවයි.
ශ්‍රී ලංකා කණ්ඩායමේ පාකිස්තාන සංචාරයේදී පැවැත්වෙන T20 තරගාවලිය අවසන් වීමෙන් අනතුරුව මෙම තුන්කොන් එක්දින තරගාවලිය පැවැත්වීමට නියමිතය.
කණ්ඩායමට අවිශ්ක ප්‍රනාන්දු, කමිල් මිෂාර, පවන් රත්නායක, සහන් ආරච්චිගේ, කමිඳු මෙන්ඩිස්, ජනිත් ලියනගේ සහ දසුන් ශානකද ඇතුළත් කර තිබේ.
දඟ පන්දු යවන්නන් ලෙස දුනිත් වෙල්ලාලගේ, මහීෂ් තීක්ෂණ සහ සචින්දු කොළඹගේ නම් කර ඇති අතර, වේග පන්දු යවන්නන් ලෙස දුෂ්මන්ත චමීර, අසිත ප්‍රනාන්දු, දිල්ෂාන් මධුශංක සහ එෂාන් මාලිංග කණ්ඩායමට ඇතුළත් වෙති.
ශ්‍රී ලංකා එක්දින කණ්ඩායම:
පැතුම් නිස්සංක, අවිශ්ක ප්‍රනාන්දු, කමිල් මිෂාර, කුසල් මෙන්ඩිස් (නායක), පවන් රත්නායක, සහන් ආරච්චිගේ, කමිඳු මෙන්ඩිස්, ජනිත් ලියනගේ, දසුන් ශානක, දුනිත් වෙල්ලාලගේ, මහීෂ් තීක්ෂණ, සචින්දු කොළඹගේ, දුෂ්මන්ත චමීර, අසිත ප්‍රනාන්දු, දිල්ෂාන් මධුශංක සහ එෂාන් මාලිංග.
