ඉන්දියාවෙන් ඇමෙරිකානු ඩොලර් මිලියන 12 ක ප්‍රදානයක් යොදා ගනිමින් ශ්‍රී ලංකාවේ උතුරු දූපත් තුනක දෙමුහුන් බලාගාර ව්‍යාපෘති ක්‍රියාත්මක කිරීම සඳහා ලංකා විදුලිබල මණ්ඩලය (CEB) අවසානයේ ටෙන්ඩර් කැඳවා ඇති අතර, එම ව්‍යාපාරයෙන් චීනය සම්පූර්ණයෙන්ම ඉවත් කර ඇතැයි වාර්තා වේ.
ශ්‍රී ලංකාව, 2021 ජනවාරි මාසයේදී, නයිනතිව්, ඩෙල්ෆ් හෝ නැදුන්තීව් සහ යාපනය වෙරළට ඔබ්බෙන් වූ අනලතිව් යන ප්‍රදේශවල දෙමුහුන් පුනර්ජනනීය බලශක්ති පද්ධතියක් ස්ථාපනය කිරීම සඳහා චීන සමාගමක් වන Sinosar-Etechwin වෙත කොන්ත්‍රාත්තුව ලබා දුන් නමුත්, ඉන්දියාව චීනයේ මැදිහත්වීමට විරෝධය දැක්වීමෙන් පසුව එය අවලංගු කළේය. මෙය චීනය සමඟ වාණිජමය විරසකයකට තුඩු දුන්නේය. චීන තානාපති කාර්යාලය ගෝඨාභය රාජපක්ෂ රජය සමඟ ද අවධානය යොමු කළේය. අනතුරුව විදුලිබල අමාත්‍ය ඩලස් අලහප්පෙරුම මහතා චීන සමාගමට ලබාදුන් ටෙන්ඩරය ඉවත් කිරීමට තීරණය කළේය.
කෙසේ වෙතත්, ඉන්දියාව මේ සම්බන්ධයෙන් ඉහළම මට්ටමින් ශ්‍රී ලංකාව සම්බන්ධ කර ගත් අතර චීනය හැර දමා ව්‍යාපෘතිය ක්‍රියාත්මක කිරීමට ප්‍රදානයක් ලබා දුන්නේය.
පසුව, කොළඹ චීන තානාපති කාර්යාලය ද ට්විටර් පණිවුඩයක් නිකුත් කරමින් කියා සිටියේ ව්‍යාපෘතිය අත්හිටුවීම තුන්වන පාර්ශ්වයක ‘ආරක්ෂක සැලකිල්ලක්’ නිසා සිදුවූවක් බවත්, මාලදිවයිනේ දූපත් 12 ක සූර්ය බලාගාර පිහිටුවීම සඳහා මාලදිවයින් රජය සමඟ ගිවිසුමක් අත්සන් කර ඇති බවත්ය.
ඉන්දියාවේ ප්‍රදානයෙන් ව්‍යාපෘතිය ක්‍රියාත්මක කිරීම සඳහා අලුතින් ටෙන්ඩර් කැඳවා ඇති බව ලංවිම ඉහල නිලධාරියෙක් ඩේලි මිරර් වෙත පැවසීය.
ජාතික ජාල දෙක එකිනෙකට සම්බන්ධ කිරීමේ අරමුණින් ශ්‍රී ලංකාවේ බලශක්ති ක්ෂේත්‍රයේ ආයෝජනය කිරීමට ඉන්දියාව දැනටමත් කටයුතු කර ඇත. ඉන්දියාවේ ප්‍රමුඛ පෙළේ සමාගමක් වන Adani විසින් මෙගාවොට් 350ක පමණ විදුලිය නිපදවීම සඳහා මන්නාරම සහ පුනරීන් ප්‍රදේශවල සුළං බලාගාර දෙකක් ආරම්භ කිරීමට ව්‍යාපෘති අනුමැතිය ලබාගෙන ඇත. සමාගම 2025 වන විට ව්‍යාපෘතිය ආරම්භ කිරීමට බලාපොරොත්තු වේ.
