ප්‍රංශ රජයට මෙන්ම එරට සංවර්ධන ආයතනය වන ප්‍රංශ සංවර්ධන ඒජන්සිය (AFD) හරහාද ශ්‍රී ලංකාවේ පුනර්ජනනීය බලශක්ති ව්‍යාපෘති සඳහා සහාය ලබාගැනීමටත්, එම ක්ෂේත්‍රයට වැඩි ආයෝජන ආකර්ෂණය කර ගැනීමටත් හැකියාව පවතින බව විපක්ෂ නායක සජිත් ප්‍රේමදාස මහතා පෙන්වා දී තිබේ.
ශ්‍රී ලංකාවේ ප්‍රංශ තානාපති රෙමි ලැම්බර්ට් මහතා සහ පුනර්ජනනීය බලශක්ති ක්ෂේත්‍රයේ නියෝජිතයන් පිරිසක් විපක්ෂ නායක කාර්යාලයේදී හමුවූ අවස්ථාවේදී ප්‍රේමදාස මහතා මේ බව සඳහන් කළේය. එහිදී ක්ෂේත්‍රය මුහුණ දෙන ගැටලු සහ ඉදිරි සංවර්ධන අවස්ථා පිළිබඳව සාකච්ඡා කර තිබේ.
රජයේ සංවර්ධන ප්‍රමුඛතා සමඟ ගැළපෙන ව්‍යාපෘති සඳහා ප්‍රංශ ආයෝජකයන් සහ ශ්‍රී ලාංකික පුනර්ජනනීය බලශක්ති ව්‍යවසායකයන් අතර සහයෝගීතාව තවදුරටත් පුළුල් කළ යුතු බවද විපක්ෂ නායකවරයා පෙන්වා දුන්නේය.
ශ්‍රී ලංකාවේ ජාතික පුනර්ජනනීය බලශක්ති ඉලක්ක සපුරා ගැනීමේ වැදගත්කමද ඔහු අවධාරණය කළේය. ඒ අතරින් 2030 වන විට මෙරට විදුලිබල උත්පාදනයෙන් 70%ක් පුනර්ජනනීය බලශක්ති මූලාශ්‍රවලින් ලබාගැනීමේ ඉලක්කයද ඔහු සඳහන් කළේය. එම 70% ඉලක්කය ශ්‍රී ලංකාවේ දැනට පවතින ජාතික බලශක්ති ප්‍රතිපත්තිවලද ඇතුළත් කර තිබේ.
වහල මත සවි කරන සූර්ය බලශක්ති පද්ධති සඳහා ගෙවීම් ක්‍රමවේදයේ සිදුකර ඇති වෙනස්කම් සම්බන්ධයෙන් ක්ෂේත්‍රයේ පාර්ශ්වකරුවන් මතුකර ඇති ගැටලු පිළිබඳවද ප්‍රේමදාස මහතා අවධානය යොමු කළේය. විශේෂයෙන්ම නෙට් මීටරින් සහ නෙට් ඇකවුන්ටින් ක්‍රමවේදවල සිට නෙට් ප්ලස් ක්‍රමවේදය වෙත මාරුවීම හේතුවෙන් සූර්ය බලශක්ති ව්‍යවසායකයන් අතර අවිනිශ්චිතතාවක් ඇති වී ආයෝජනවල ශක්‍යතාවට බලපෑම් එල්ල වී ඇති බව ඔහු පැවසීය.
සූර්ය බලශක්ති ව්‍යාපෘති සඳහා බලපත්‍ර නිකුත් කිරීමේ ප්‍රමාදයන් සහ අනෙකුත් නියාමන ගැටලු පිළිබඳවද ඔහු අවධානය යොමු කළේය. දේශීය මෙන්ම විදේශීය ආයෝජන ආකර්ෂණය කර ගැනීම සඳහා ස්ථාවර සහ පුරෝකථනය කළ හැකි ප්‍රතිපත්ති පරිසරයක් අවශ්‍ය බවද ඔහු අවධාරණය කළේය.
එමෙන්ම, විදුලි ගාස්තු ස්ථාවරව පවත්වා ගනිමින් අඛණ්ඩ, ගුණාත්මක සහ දැරිය හැකි මිලකට විදුලි සැපයුමක් සහතික කිරීමේ වැදගත්කමද විපක්ෂ නායකවරයා පෙන්වා දුන්නේය.
සූර්ය බලශක්ති කර්මාන්තය පුළුල් කිරීම තුළින් තරුණ ශ්‍රී ලාංකිකයන් සඳහා නව ව්‍යවසායකත්ව අවස්ථා නිර්මාණය කළ හැකි බවත්, දිගුකාලීනව ශ්‍රී ලංකාව සම්පූර්ණයෙන්ම පුනර්ජනනීය බලශක්තිය මත පදනම් වූ බලශක්ති පද්ධතියක් වෙත මාරුවීමේ අරමුණටද එය දායක වනු ඇති බවත් ප්‍රේමදාස මහතා සඳහන් කළේය.
පුනර්ජනනීය බලශක්ති සංවර්ධනය පක්ෂ දේශපාලනයෙන් ඔබ්බට ගිය කරුණක් ලෙස සැලකිය යුතු බවද ඔහු අවධාරණය කළේය. ඒ සඳහා රජය, ආයෝජකයන්, කර්මාන්ත ක්ෂේත්‍රයේ පාර්ශ්වකරුවන් සහ ජාත්‍යන්තර සංවර්ධන හවුල්කරුවන් අතර වඩාත් ශක්තිමත් සහයෝගීතාවක් අවශ්‍ය බවද ඔහු පැවසීය.
ප්‍රංශ තානාපති කාර්යාලයේ ආර්ථික උපදේශක ෆිලිප් ෆුවේ, දේශපාලන නිලධාරීන් වන ඇනා බෙලර්ක් සහ දිනූෂා ඉලේපෙරුම මෙන්ම පුනර්ජනනීය බලශක්ති ක්ෂේත්‍රයේ නියෝජිතයන් පිරිසක්ද මෙම සාකච්ඡාවට සහභාගී වූහ.
