වැලිකඩ පොලිසියේ අත්අඩංගුවේ සිටියදී ගෘහ සේවිකාව රාජකුමාරිගේ මරණය මොට ආයුධවලින් පහරදීමෙන් සිදුවූ ඝාතනයක් බවට තීන්දු කළ කොළඹ අතිරේක මහේස්ත්‍රාත් හර්ෂණ කැකුණවල සැකකරුවන් අත්අඩංගුවට ගෙන අධිකරණයට ඉදිරිපත් කරන ලෙස අපරාධ පරීක්ෂණ දෙපාර්තමේන්තුවට (CID) ඊයේ නියෝග කළේය.
ඇයගේ මරණය සම්බන්ධයෙන් පැවති මහේස්ත්‍රාත් පරීක්ෂණයේදී අපරාධ පරීක්ෂණ දෙපාර්තමේන්තුව ගොනුකළ වාර්තාව නිරීක්ෂණය කරමින් ඔහු මෙම නියෝගය කළේය.
මෙම මරණය ස්වභාවික හේතූන් මත සිදුවූවක් නොවන බවත්, මොට ආයුධවලින් පහරදීමෙන් වින්දිතයාගේ සිරුරට සිදුවූ මාරාන්තික තුවාල හේතුවෙන් සිදුවූ මරණයක් බවත් තීන්දුවේ නිරීක්ෂණය විය. අපරාධකරුවන් අත්අඩංගුවට ගන්නා ලෙස මහේස්ත්‍රාත්වරයා අපරාධ පරීක්ෂණ දෙපාර්තමේන්තුවට නියෝග කළේය.
බදුල්ල ප්‍රදේශයේ පදිංචි 41 හැවිරිදි රාජකුමාරි පසුගිය මැයි 11 වැනිදා වැලිකඩ පොලිසිය විසින් අත්අඩංගුවට ගනු ලැබුවේ ඇයගේ හාම්පුතා වන සුධර්මා නෙත්තිකුමාර විසින් වැලිකඩ පොලිසියට කළ පැමිණිල්ලකට අනුවයි.
මහේන්ද්‍ර සුරේෂ් නමැති සාක්ෂිකරු සාක්‍ෂි දෙමින් කියා සිටියේ වැලිකඩ පොලිසියේ නිලධාරීන් රාජකුමාරිට පහර දෙන අයුරු තමා දුටු බවයි. සාක්ෂිකරු පිටකොටුව බස් නැවතුම්පළේදී අත්අඩංගුවට ගෙන මියගිය කාන්තාව සේවය කළ බොරැල්ල කොටා පාරේ නිවසකට රැගෙන ගොස් ඇත.
තමා සහ රාජකුමාරි දෙදෙනාම එකට මාංචු දමා තිබූ බවත්, ඒ වන විට ඇය හොඳ සෞඛ්‍ය තත්ත්වයෙන් පසුවූ බවත් සාක්ෂිකාරිය පැවසුවාය. ඔවුන් වැලිකඩ පොලිසියට රැගෙන ඒමෙන් පසු පොලිස් නිලධාරීන් දෙදෙනෙක් ඔහුට සහ රාජකුමාරිට පහර දී ඇත.
