හිටපු ජනාධිපති මහින්ද රාජපක්ෂ මහතා එවැන්නක් ඉල්ලා නොමැති බැවින් ලංකා විදුලිබල මණ්ඩලයේ ප්‍රතිව්‍යුහගත කිරීම අඛණ්ඩව සිදුකරන බව විදුලිබල හා බලශක්ති අමාත්‍ය කාංචන විජේසේකර මහතා පාර්ලිමේන්තුවේදී පැවසීය.
“මහින්ද රාජපක්ෂ මහතා රාජ්‍ය ව්‍යවසාය ප්‍රතිව්‍යුහගත කිරීම කල් දමන ලෙස ඉල්ලා නැත. රාජ්‍ය ව්‍යවසාය විකිණීම කල් දමන ලෙස පමණක් ඉල්ලා ඇත. විදුලිබල මණ්ඩලය විකිණීමේ අදහසක් අපට නැත. විදුලිබල මණ්ඩලයේ ප්‍රතිව්‍යුහගත කිරීම ඉදිරියටත් ගෙන යනු ඇත,” විජේසේකර අමාත්‍යවරයා පැවසීය.
අමාත්‍යවරයා මේ බව පැවසුවේ විපක්ෂයේ ප්‍රධාන සංවිධායක ලක්ෂ්මන් කිරිඇල්ල මහතා විසින් අසන ලද ප්‍රශ්නයකට පිළිතුරු දෙමිනි.
කිරිඇල්ල මන්ත්‍රීවරයා මේ බව කියා සිටියේ රාජ්‍ය ව්‍යවසායන් පෞද්ගලීකරණය කිරීම නතර කරන ලෙස ඉල්ලා රාජපක්ෂ මහතා ජනාධිපති වික්‍රමසිංහ මහතා වෙත යැවූ ලිපියක් පිළිබඳවය.
“විජේසේකර ඇමතිතුමා ඉන්නේ ජනාධිපති වික්‍රමසිංහ එක්කද මහින්ද රාජපක්ෂ එක්කද කියලා අපි දැනගන්න කැමතියි,” ඔහු ප්‍රශ්න කළේය.
