මැතිවරණයක් ආසන්නයේ අසාධාරණ වැඩ වර්ජන දියත් කිරීමෙන් දරුවන්ට අධ්‍යාපනය ලැබීමේ අවස්ථාව අහිමි කර ඇති බව තාක්ෂණ රාජ්‍ය අමාත්‍ය කනක හේරත් ප්‍රකාශ කළා.
මෙම වැඩ වර්ජන සහ විරෝධතාවල අරමුණ ජනතාව දැනට භුක්ති විඳින සුවපහසු ජීවන තත්ත්වය කඩාකප්පල් කිරීමට දැයි විපක්ෂය පැහැදිලි කළ යුතු බව රාජ්‍ය අමාත්‍යවරයා වැඩිදුරටත් අවධාරණය කළේය.
තාක්ෂණ රාජ්‍ය අමාත්‍ය කනක හේරත් මහතා මේ බව සඳහන් කළේ ‘ස්ථාවර දේශයකට සාමූහික මාවතක්’ යන තේමාව යටතේ ඊයේ (08) ජනාධිපති මාධ්‍ය මධ්‍යස්ථානයේ පැවැති ප්‍රවෘත්ති සාකච්ඡාවට එක්වෙමිනි.
වැඩිදුරටත් අදහස් දැක්වූ රාජ්‍ය අමාත්‍යවරයා,
“2022 සිට අපේ අමාත්‍යාංශය ප්‍රතිපත්ති සහ ප්‍රතිසංස්කරණ රාශියක් ආරම්භ කර තිබෙනවා. පනත් කෙටුම්පත් කිහිපයක් පාර්ලිමේන්තුවට ඉදිරිපත් කර ඇති අතර අතිරේක පනත් කඩිනමින් ඉදිරිපත් කිරීමට අපේක්ෂා කෙරේ.
මීට අමතරව, අපි ලෝක බැංකුව සමඟ සහයෝගයෙන් 2020-2030 ඩිජිටල් ආර්ථික සැලැස්ම දියත් කර ඇත. අපගේ ඉලක්කය වන්නේ 2030 වන විට වර්තමාන ඇමරිකානු ඩොලර් බිලියන 03 ඩිජිටල් ආර්ථිකය ඩොලර් බිලියන 30 දක්වා පුළුල් කිරීමයි.
වසර 28කට පසු සිදු කෙරෙන පළමු සංශෝධනය සනිටුහන් කරමින් විදුලි සංදේශ පනතට සංශෝධන හෙට (09) පාර්ලිමේන්තුවට ඉදිරිපත් කිරීමට අපේක්ෂා කෙරේ. මෙම සංශෝධන මගින් පාරිභෝගික ආරක්ෂාව වැඩිදියුණු කිරීම සහ දුරකථන සමාගම් අතර සාධාරණ තරඟකාරිත්වය වර්ධනය කිරීම අරමුණු කර ඇත. මීට පෙර, මෙම පනත විදුලි සංදේශ පද්ධති බලපත්‍රවලට පමණක් සීමා විය. යෝජිත සංශෝධන සමඟ බලපත්‍ර ක්‍රියාවලියම වෙනස්කම් වලට භාජනය වේ.
මීට අමතරව, අනාගතයේදී අන්තර්ජාල පහසුකම් සැපයීම සඳහා චන්ද්‍රිකා තාක්ෂණය භාවිතා කිරීමට සැලසුම් කර ඇත. මුහුද යට කේබල් සේවා නියාමනය කිරීමට සහ බලපත්‍ර ලබා දීමට උත්සාහ කරමින් පවතී. තාක්ෂණ ප්‍රවර්ධන පනත මේ වසරේ ඉදිරිපත් කිරීමට නියමිතය.
එපමණක් නොව, තාක්ෂණ හා නවෝත්පාදන කොමිෂන් සභාව ස්ථාපිත කිරීමට අපේක්ෂා කෙරේ. ජාතික සංවර්ධනය සහ නවෝත්පාදන සඳහා සම්පත් වෙන් කිරීම, පර්යේෂණ වාණිජකරණයට පහසුකම් සැලසීම සහ උපදේශන සේවා සැපයීම මෙම කොමිසමේ අරමුණයි.
වත්මන් වෘත්තීය සමිති ක්‍රියාකාරකම් අනුව සියලුම රජයේ සේවකයන් සඳහා රුපියල් 20,000ක දීමනාවක් ලබාදෙන ලෙස ඉල්ලීමක් කර ඇත. මේ සඳහා රුපියල් බිලියන 280 ක අතිරේක වාර්ෂික වියදමක් අවශ්‍ය වේ. පවතින ආර්ථික තත්ත්වය අනුව මෙම වියදම් කළමනාකරණය කරන්නේ කෙසේද යන්න පැහැදිලි කරන ලෙස විපක්ෂයෙන් ඉල්ලා සිටියි.
තවද මැතිවරණයක් ආසන්නයේ දියත් කරන ලද අසාධාරණ වැඩ වර්ජන නිසා දරුවන්ගේ අධ්‍යාපන අවස්ථා අහිමි වී ඇත. ඔවුන්ගේ ක්‍රියා සාමාන්‍ය පුරවැසියන්ගේ සුබසාධනයට බලපාන බව මෙම වැඩ වර්ජනවලට සහභාගී වන අය තේරුම් ගත යුතුය.
ජාත්‍යන්තර මූල්‍ය අරමුදල (IMF) අඩු ආදායම්ලාභීන් සඳහා මේ වසරේ රුපියල් බිලියන 11ක් ලබාදීමට නිර්දේශ කර ඇත. තම විරෝධතාවල අරමුණ මහජනතාවට සුවපහසු ජීවන තත්ත්වයක් සඳහා ඇති ප්‍රවේශය කඩාකප්පල් කිරීම දැයි විරුද්ධ පක්ෂ පැහැදිලි කළ යුතුය.
