“ජනාධිපති ධූරයෙන් මා නෙරපීමේ කුමන්ත්‍රණය”කෘතිය හිටපු ජනපති ගෝඨාභය රාජපක්ෂ මහතා විසින් ඊයේ (22) මල්වතු-අස්ගිරි මහනාහිමිවරුන් දෙනම වෙත පිළිගන්වනු ලැබීය.
ශ්‍රී දළදා මාලිගාවට ගොස් දළදා සමිඳුන් වැඳපුදා ගැනීමෙන් පසු ග්‍රන්ථයේ පිටපතක් දියවඩන නිලමේවරයා වෙත ලබාදුන් ගෝඨාභය රාජපක්ෂ මහතා අනතුරුව මල්වතු මහා විහාරයට ගොස් එම පාර්ශ්වයේ මහනායක අතිපූජ්‍ය තිබ්බටුවාවේ ශ්‍රී සිද්ධාර්ථ සුමංගල මහනාහිමියන් බැහැදැක ආශිර්වාද ලබා ගත්තේය. අස්ගිරි මහා විහාරයට ගොස් එම පාර්ශ්වයේ මහනායක අතිපූජ්‍ය වරකාගොඩ ශ්‍රී ඤාණරතන මහනාහිමියන් ද බැහැදැක ආශිර්වාද ලබාගත් ගෝඨාභය රාජපක්ෂ මහතා උන්වහන්සේ සමඟ ද පෞද්ගලික සාකච්ඡාවක ද නිරත විය.
හිටපු ජනපතිවරයා මල්වතු පාර්ශ්වයේ අනුනාහිමිවරු වන නියංගොඩ ශ්‍රී විජිතසිරි හා දිඹුල්කුඹුරේ විමලධම්ම නාහිමිවරු දෙනම බැහැදැක ග්‍රන්ථයේ පිටපත් පිළිගැන්වීය.පසුව ඒ මහතා අස්ගිරි පරිවේණාධිපති නාරංපනාවේ ආනන්ද නාහිමියන් ද බැහැ දැක ආශිර්වාද ලබා ගත්තේය.
