නොසලකා හැරීම, දරාගත නොහැකි බදු බරින් ඇති වූ බුද්ධි ගලනය සහ පැරණි ප්‍රතිපත්තිවලට ඇලී සිටීම හේතුවෙන් රටේ අධ්‍යාපන ක්ෂේත්‍රය දැඩි අර්බුදයකට ලක්ව ඇති බව විපක්ෂ නායක සජිත් ප්‍රේමදාස මහතා ඊයේ පාර්ලිමේන්තුවේදී ප්‍රකාශ කළේය.
අධ්‍යාපන අමාත්‍යාංශයේ වැය ශීර්ෂ යටතේ 2024 අයවැය විවාදයට එක්වෙමින් ප්‍රේමදාස කියා සිටියේ විශ්වවිද්‍යාල ආචාර්යවරුන්ගෙන් අඩක් පමණ විදේශ රැකියා සඳහා රට හැර ගොස් ඇති බවයි. “විශ්වවිද්‍යාලවල ආචාර්යවරුන් 12,000ක් වත් සිටිය යුතු නමුත් දැනට අපට සිටින සැබෑ සංඛ්‍යාව 5,000ක් පමණ වන අතර එයද ශීඝ්‍රයෙන් අඩුවෙමින් පවතින්නේ දැරිය නොහැකි බදු හේතුවෙන් විශ්වවිද්‍යාල ආචාර්යවරුන් රට හැර යන බැවිනි.”
ප්‍රේමදාස පැවසුවේ පළමු ශ්‍රේණියේ සිට 13 ශ්‍රේණිය දක්වා සියලුම සිසුන්ට ඉංග්‍රීසි මාධ්‍යයෙන් තොරතුරු තාක්ෂණ අධ්‍යාපනය ලබාදිය යුතු බවයි. “සියල්ල සිංහලෙන් ඉගැන්වීමට 1950 ගණන්වල ඇති කළ ප්‍රතිපත්ති අදට වලංගු නැත. අපි ජාතියක් ලෙස දූපත් මානසිකත්වයෙන් මිදිය යුතුයි. පාසල්වල බොහෝ විෂයයන් සඳහා ඉගැන්වීමේ මාධ්‍යයක් ලෙස ඉංග්‍රීසි භාවිතා කිරීමට කාලය පැමිණ තිබේ.
කොවිඩ් වසංගතය හේතුවෙන් වසර දෙකක කාලයක් සිසුන්ට මගහැරී තිබූ අධ්‍යාපනයට අතිරේකයක් ලබාදීමට කටයුතු කර නොමැත.
පෞද්ගලික විශ්වවිද්‍යාල අධ්‍යාපනයට විරුද්ධ බොහෝ දෙනකුගේ දරුවෝ විදේශ විශ්වවිද්‍යාලවල ඉගෙනුම ලබති.
