වසර 2020 වන විට ශ්‍රී ලංකාව ඇමෙරිකානු ඩොලර් මිලියන 611.53ක් වටිනා ප්ලාස්ටික් භාණ්ඩ ආනයනය කර ඇති බව එක්සත් ජාතීන්ගේ COMTRADE දත්ත ගබඩාව මගින් අනාවරණය කර ඇති බව පරිසර අමාත්‍ය මහින්ද අමරවීර මහතා පවසයි.
ඔහු මේ අදහස් පළ කළේ පසුගියදා පරිසර අමාත්‍යාංශයේදී පරිසරවේදීන් පිරිසක් සමඟ පැවැති සාකච්ඡාවකදීය.
ප්ලාස්ටික් සහ පොලිතින් නිසා සිදුවන පරිසර හානිය පිළිබඳ සාකච්ඡාවට පරිසර යුක්ති කේන්ද්‍රයේ පරිසරවේදීන් පිරිසක් එක්ව සිටියහ.
“අපේ රටේ වර්තමාන පරිසර හානියට පොලිතින් සහ ප්ලාස්ටික් විශාල බලපෑමක් කරනවා. වාර්ෂිකව ප්ලාස්ටික් ටොන් 300,000 ක් පමණ ආනයනය කරනු ලැබේ. මෙයින් ප්‍රතිචක්‍රීකරණය කරන්නේ 7.1%ක් පමණයි,” ඔහු පැවසීය.
ඉතිරි 92.9% නීති විරෝධී ලෙස පරිසරයට මුදා හරින බවත්, ඒවායින් බොහොමයක් මිනිසුන් විසින් ගිනි තබා විනාශ කරන බැවින් දැඩි වායු දූෂණයක් සිදුවන බවත් අමාත්‍යවරයා පැහැදිලි කළේය.
පොලිතීන් සහ ප්ලාස්ටික් භාවිතය අවම කිරීම සඳහා නිෂ්පාදන කිහිපයක් තහනම් කිරීමට අමාත්‍යාංශය ගත් තීරණය හේතුවෙන් එක් වරක් පමණක් භාවිත කළ හැකි මල්ල (ආහාර නොවන සහ ඖෂධ) තහනම් කිරීම දැන් 100%ක් සාර්ථක වී ඇති බව අමාත්‍ය අමරවීර මහතා පැවසීය.
ඉදිරි මාස තුන ඇතුළත දිරාපත් නොවන ලන්ච් ෂීට් භාවිතය රටින් තුරන් කිරීමට පියවර ගන්නා බවත් ඒ සඳහා සියලු පරිසර සංවිධාන හා පරිසරවේදීන්ගේ සහයෝගය අපේක්ෂා කරන බවත් ඔහු වැඩිදුරටත් සඳහන් කළේය.
