නව කොවිඩ්-19 ප්‍රභේදය වන ‘ඔමික්‍රොන්’ රට තුළට පැමිණීම වැළැක්වීමට අවශ්‍ය සියලු ක්‍රියාමාර්ග රජය ගෙන ඇති බව අමාත්‍ය නාමල් රාජපක්ෂ මහතා ඊයේ ප්‍රකාශ කළේය.
සියලුම ගුවන් තොටුපළවල සෞඛ්‍ය මාර්ගෝපදේශ දැඩි ලෙස අනුගමනය කරන බවත්, මගීන්ගේ සෞඛ්‍ය ඉතිහාසය පවා ගුවන් තොටුපළේදී පරීක්ෂා කළ බවත් ඔහු පාර්ලිමේන්තුවට පැවසීය.
“සියලුම ගුවන් තොටුපලවල සෞඛ්‍ය මාර්ගෝපදේශ දැඩි ලෙස අනුගමනය කරනු ලැබේ. ගුවන් තොටුපළේදී මගීන්ගේ සෞඛ්‍ය ඉතිහාසය පවා පරීක්ෂා කෙරේ. මෙම ක්‍රියාවලියේදී ගුවන් තොටුපළ කාර්ය මණ්ඩලයට සහාය වීම සඳහා අපි තාක්ෂණ අමාත්‍යාංශය සහ ගුවන් තොටුපළ සමඟ එක්ව සෞඛ්‍ය ඇප් එකක් ද හඳුන්වා දී තිබෙනවා,” ඔහු පැවසීය.
නව ප්‍රභේදය රට තුළට පැමිණීම වැළැක්වීමට ගෙන ඇති ක්‍රියාමාර්ග මොනවාදැයි විමසූ විපක්ෂ නායක සජිත් ප්‍රේමදාස මහතා ඇසූ ප්‍රශ්නයකට පිළිතුරු දෙමින් අමාත්‍යවරයා කියා සිටියේ නව ප්‍රභේදය මෙරටට ඇතුළුවීම වැළැක්වීමට අවශ්‍ය සියලු ක්‍රියාමාර්ග දින තුනකට පෙර සෞඛ්‍ය බලධාරීන් විසින් ගෙන ඇති බවයි.
නව ප්‍රභේදය ලෝක සෞඛ්‍ය සංවිධානය විසින් නම් කර ඇත්තේ අවධානයට ලක්වන ප්‍රභේදයක් ලෙස බවත්, ඊට මුහුණ දීමට දැඩි ක්‍රියාමාර්ග ගත යුතු බව සෞඛ්‍ය බලධාරීන් පෙන්වා දී ඇති බවත් විපක්ෂ නායකවරයා පැවසීය.
ආරක්‍ෂක පියවරක් ලෙස රටවල් හයකින් ශ්‍රී ලංකාවට ඇතුළු වන මගීන්ට දැනටමත් සංචාරක සීමා පනවා ඇති බව අමාත්‍යවරයා පැවසීය.
