රජයේ වෛද්‍ය නිලධාරීන්ගේ සංගමය (GMOA) විසින් වේදනානාශක, ප්‍රතිජීවක ඖෂධ, අධිරුධිර පීඩනය සඳහා වන ඖෂධ, දියවැඩියාව සඳහා වන ඖෂධ, වකුගඩු රෝග සඳහා වන ඖෂධ ඇතුළු අත්‍යවශ්‍ය ඖෂධ වර්ග රැසක දැඩි හිඟයක් පවතින බව අනතුරු අඟවා ඇත.
GMOA මාධ්‍ය ප්‍රකාශක වෛද්‍ය චමිල් විජේසිංහ මහතා සඳහන් කළේ, මධ්‍යම ඖෂධ ගබඩාව තුළ අත්‍යවශ්‍ය ඖෂධ වර්ග 180ක පමණ ප්‍රමාණයක හිඟයක් දැනට පවතින බවයි. මේ අතර, පිළිකා රෝගීන් සඳහා ලබාදෙන විශේෂිත ඖෂධයක දැඩි හිඟයක් පසුගිය මාස කිහිපය පුරා පැවති බවත්, එම නිසා පිළිකා රෝගීන්ට ලබාදෙන ප්‍රතිකාර සීමා වීමට සිදුවී ඇති බවත් ඔහු පෙන්වා දුන්නේය. වෛද්‍ය විජේසිංහ මහතා වැඩිදුරටත් පැහැදිලි කළේ, “මේ වන විට සෞඛ්‍ය පද්ධතිය තුළ මේ ඖෂධ මෙන්ම වෛද්‍ය සහ ශල්‍ය උපකරණ ගණනාවකත් හිඟයක් පවතිනවා. පසුගිය මැයි මාසය වන විට ලැබුණු නිල දත්ත වාර්තා අනුව මධ්‍යම ඖෂධ ගබඩාව තුළ අත්‍යවශ්‍ය ඖෂධ වර්ගවලින් 180ක ප්‍රමාණයක තොග හිඟතාවක් දක්නට ලැබුණා” යනුවෙනි.
තවද, රෝහල් පද්ධතිය තුළ ඖෂධ වර්ග 50කට අධික ප්‍රමාණයක හිඟයක් පවතින බවත්, ලැබෙන තොරතුරු අනුව මෙම තත්ත්වය තවදුරටත් උග්‍ර වෙමින් පවතින බවත් ඔහු අවධාරණය කළේය.
විශේෂයෙන්ම පිළිකා රෝගීන් සඳහා වන ඖෂධයක දැඩි හිඟයක් පසුගිය මාස ගණනාවක සිට පවතින බවත්, එම නිසා පිළිකා රෝගීන්ට ලබාදෙන ප්‍රතිකාර කටයුතුවල යම් සීමාවන් මතුවී ඇති බවත් GMOA මාධ්‍ය ප්‍රකාශකවරයා වැඩිදුරටත් පෙන්වා දුන්නේය.
මෙම ඖෂධ හිඟය පිළිබඳව සෞඛ්‍ය අමාත්‍යාංශය හෝ රජය තවමත් නිල ප්‍රකාශයක් නිකුත් කර නොමැති අතර, රෝගීන්ගේ සෞඛ්‍ය තත්ත්වයට මෙම හිඟය බලපාන ආකාරය පිළිබඳව GMOA විසින් දැඩි අවධානය යොමු කර ඇත.
තත්ත්වය පාලනය කිරීම සඳහා කඩිනම් පියවර ගැනීමේ අවශ්‍යතාවය පිළිබඳව GMOA අවධාරණය කරන අතර, රෝගීන්ගේ ජීවිත අවදානමට ලක්විය හැකි බැවින් ඖෂධ හිඟය කඩිනමින් විසඳීම සඳහා රජයේ මැදිහත්වීම අවශ්‍ය බව පෙන්වා දී ඇත.
