දරුවන් විසින් නොසලකා හරින සරණක් අවැසි වැඩිහිටියන් පිළිබඳ තොරතුරු ලබාදීම සඳහා ජාතික වැඩිහිටි මහ ලේකම් කාර්යාලය වට්ස් ඇප් අංකයක් හඳුන්වා දී තිබේ.
දරුවන් විසින් නොසලකා හරින ලද වැඩිහිටියන්ට නඩත්තු ඉල්ලීම වැනි කාරනා ගැන මෙම වට්ස් ඇප් අංකයට දැනුම් දිය හැකි බව වැඩිහිටි ලේකම් කාර්යාලය කියයි. 0707 89 88 89 එම වට්ස් ඇප් දුරකථන අංකයයි.
එක්සත් ජාතීන්ගේ මහා මණ්ඩලය විසින් සෑම වසරකම ජුනි 15 වැනිදා “ලෝක වැඩිහිටි අපයෝජන පිළිබඳ දැනුවත් කිරීමේ දිනය” ලෙස ප්‍රකාශයට පත්කර තිබෙන අතර ඊට සමගාමීව ග්‍රාමීය සංවර්ධන, සමාජ ආරක්ෂණ හා ප්‍රජා සවිබලගැන්වීම් අමාත්‍යංශයට අනුබද්ධ ජාතික වැඩිහිටි මහ ලේකම් කාර්යාලය මගින් වැඩිහිටි ප්‍රජාව වෙනුවෙන් “සරණ” නමින් මෙම උපකාරක සේවය ආරම්භ කර ඇත.
මෙම අවස්ථාව සංකේත්වත් කරමින් ග්‍රාමීය සංවර්ධන, සමාජ ආරක්ෂණ හා ප්‍රජා සවිබලගැන්වීම් අමාත්‍ය ආචාර්ය උපාලි පන්නිලගේ මහතා හා නියෝජ්‍ය අමාත්‍ය වසන්ත පියතිස්ස මහතාගේ ප්‍රධානත්වයෙන් අමාත්‍යංශ පරිශ්‍රයේදී නිල වශයෙන් වට්ස් ඇප් අංකය ජනගත කිරීම සිදු කෙරිණි.
