බුද්ධාගම ඇතුළු අන්‍ය ආගම්වලට අපහාස සිදුකරන ලදැයි චෝදනා ලැබ සිටින ජෙරම් ප්‍රනාන්දු දේවගැතිවරයා තමන් අත් අඩංගුවට ගැනීමට එරෙහිව පවරා ඇති නඩුව සහ ඊට සම්බන්ධ ලියකියවිලි ඉතා සුරක්ෂිතව තබන ලෙස ශ්‍රේෂ්ඨාධිකරණය අභියාචනාධිකරණයේ රෙජිස්ට්‍රාර්වරයාට නියෝග කළේය.
ශ්‍රේෂ්ඨාධිකරණය මෙසේ නියෝග කළේ නීතිපතිවරයා විසින් එම නඩුවට එරෙහිව ගොනු කළ අභියාචන පෙත්සම විභාගයට අවසර ලබා දෙමිනි.
මෙම අභියාචන පෙත්සම අගෝස්තු 28 වැනිදා විභාගයට ගැනීමටද දින නියම කළේය.
මෙම අභියාචන පෙත්සම එස්.තුරේරාජා සහ අචල වෙන්ගප්පුලි යන මහත්වරුන්ගෙන් සමන්විත ශ්‍රේෂ්ඨාධිකරණ විනිසුරු මඩුල්ලක් හමුවේ සලකා බැලින.
නීතිපතිවරයා විසින් ගොනුකර තිබූ මෙම අභියාචන පෙත්සමේ වග උත්තරකරු ලෙස දේවගැති ජෙරම් ප්‍රනාන්දු නම් කරනු ලැබ ඇත.
ශ්‍රී ලංකාවට පැමිණෙන විට ගුවන් තොටුපොළේදී තමන් අත් අඩංගුවට ගැනීම වළකාලන ලෙස ඉල්ලමින් ජෙරම් ප්‍රනාන්දු දේවගැතිවරයා ගොනු කළ රිට් පෙත්සම සලකා බැලීමෙන් පසු දේවගැතිවරයා ගුවන් තොටුපොළේදී අත් අඩංගුවට නොගන්නා ලෙසත් පැය 48 කින් පසුව ඔහුට එරෙහිව නිතිය ක්‍රියාත්මක කරන ලෙසත් අධිකරණය නියෝග කළේය.
එම නියෝගයෙන් අතෘප්තියට පත් නීතිපතිවරයා විසින් මෙම අභියාචන පෙත්සම ශ්‍රේෂ්ඨාධිකරණයේ ගොනු කරනු ලැබ තිබිණ.
නීතිපති වෙනුවෙන් රජයේ ජ්‍යෙෂ්ඨ නීතිඥ ෂවින්ද්‍ර වික්‍රම මහතා පෙනී සිටියේය.
දේවගැති ජෙරම් ප්‍රනාන්දු වනුවෙන් ජනාධිපති නීතිඥ ජගත් වික්‍රමනායක මහතා පෙනී සිටියේය.
