ඉන්ධන දීමනාව වැටුපට එක්කර තිබියදී උතුරුමැද පළාත් සභා මුදලින් රුපියල් ලක්‍ෂ 80කට අධික ඉන්ධන ලබාගැනීමේ චෝදනාවන්ට වරදකරුවන් කරමින් තමන්ට පැනවු දඬුවම් වලින් තමන් නිදොස් කොට නිදහස් කරන්නැයි ඉල්ලා උතුරුමැද පළාත් සභාවේ හිටපු මහ ඇමති එස්.එම්. රංජිත් මහතා සහ ඔහුගේ ණෑනා වන ශාන්ති චන්ද්‍රසේන මහත්මිය අභියාචනයක් ඊයේ (03) ඉදිරිපත් කළහ.
තමන්ට එරෙහි චෝදනාවන් ඔප්පු කර නොතිබියදී මහාධිකරණ විනිසුරුවරයා තමන් වරදකරුවන් කර ඇතැයි සඳහන් කරන එස්.එම්. රංජිත් මහතා සහ ශාන්ති චන්ද්‍රසේන මහත්මිය දේශපාලන උවමනාවන් මත මෙම පැමිණිල්ල කල බව පැමිණිල්ලේ පළමුවන සාක්කිකරු වන කිරිබණ්ඩාගේ නිමල් විජේතිලක මහතාගේ සාක්කි වලින් හෙළි වු කරුණු පිළිබඳව හෝ විනිසුරුවරයා සැළකිල්ල දක්වා නැතැයි අභියාචනයේ සඳහන් කර ඇත.
ඉන්ධන දීමනාව වැටුපට එක්කර තිබියදී උතුරුමැද පළාත් සභා මුදලින් රුපියල් ලක්‍ෂ 80කට අධික ඉන්ධන ලබාගැනීමේ චෝදනාවන්ට එස්.එම්. රංජිත් මහතා සහ ශාන්ති චන්ද්‍රසේන මහත්මිය වරදකරුවන් කරමින් ඔවුන්ට වසර 16 බැගින් බරපතල වැඩ සහිත සිරදඬුවම් සහ රුපියල් ලක්‍ෂ 02 බැගින් දඩ නියම කරමින් කොළඔ මහාධිකරණ විනිසුරු ආදිත්‍ය පටබැඳි මහතා පැනවු තීන්දුවට හා දඬුවමට එරෙහිව අභියාචනාධිකරණයට මෙලෙස අභියාචනා ඉදිරිපත් කර ඇත.
උතුරුමැද පළාත් සභාවේ හිටපු මහ ඇමති එස්.එම්. රංජිත් සමරකෝන් මහතා සහ ඔහුගේ ණෑනා වන හිටපු ඉඩම් අමාත්‍ය එස්.එම්. චන්ද්‍රසේන මහතාගේ බිරිඳ වන ශාන්ති චන්ද්‍රසේන මහත්මිය ගොනු කළ මෙම අභියාචනයන් වල වගඋත්තරකරු වශයෙන් අල්ලස් හෝ දුෂණ චෝදනා විමර්ශන කොමිසම නම් කර ඇත.
නීතීඥ අංජන කළිඳු මහතා මඟින් ඉදිරිපත් කළ සිය අභියාචනා පෙත්සම් ඊයේ (03) පෙරවරුවේ මහාධිකරණ ලේඛාධිකාරීවරයාට බාරදුන්හ.
2012 සැප්තැම්බර් මස 27 වැනිදාත් 2014 දෙසැම්බර් මස 31 වැනිදාත් අතර කාලයේ අනුරාධපුරයේදී උතුරු මැද පළාත් සභාවේ මහ ඇමතිවරයා වශයෙන් හා ඔහුගේ පෞද්ගලික ලේකම්වරිය වශයෙන් කටයුතු කරමින් සිටියදී අල්ලස් පනත යටතේ විග්‍රහ කෙරෙන දුණෂය නමැති වරද කළ බවට විත්තිකරුවන්ට එරෙහිව අල්ලස් හෝ දුෂණ චෝදනා විමර්ශන කොමිසම නඩු පවරා ඇත.
උතුරු මැද පළාත් සභාවේ ප්‍රධාන ඇමතිවරයාගේ පෞද්ගලික ලේකම්වරිය වශයෙන් කටයුතු කළ දෙවැනි විත්තිකාරියට හිමි ඉන්ධන දීමනාව ඇගේ වැටුපට එක් කර තිබියදී උතුරු මැද පළාත් සභාව එහි ප්‍රධාන ඇමතිවරයා වශයෙන් පළමු විත්තිකරුට නිකුත් කර තිබු වව්චර් පත් මඟින් රුපියල් 26,80,528/-ක ඉන්ධන ලබාගැනීම සහ එලෙස ඉන්ධන ලබාගැනීම සඳහා පළාත් සභා නිලධාරීන් පොළඔවන ලදැයි විත්තිකරුවන්ට එරෙහිව අල්ලස් කොමිසම චෝදනා නඟා ඇත.
රජයේ චක්‍රලේඛණය අනුව උතුරුමැද පළාත් සභාවේ ප්‍රධාන ඇමතිවරයා වශයෙන් තමාට හිමිව තිබු මෝටර් රථ දෙකට හා ආරක්‍ෂක රථයට අමතරව තවත් වාහන තුනක් තමාට මුදාහැරීමට පළාත් සභා නිලධාරීන් පොළඔවන ලදැයි විත්තිකරුවන්ට එරෙහිව අල්ලස් කොමිසම වැඩිදුරටත් චෝදනා නඟා තිබිණී.
දීර්ඝ නඩු විභාගයකින් අනතුරුව අදාළ චෝදනාවන්ට විත්තිකරුවන් වරදකරුවන් බව තීරණය කළ විනිසුරුවරයා ඔවුන්ට වසර 16 බැගින් බරපතල වැඩ සහිත සිරදඬුවම් සහ රුපියල් ලක්‍ෂ 02 බැගින් දඩ ගෙවීමටද නියම කෙරිණී.
එම තීන්දුවට හා දඬුවමට එරෙහිව අභියාචනය කරන එස්.එම්. රංජිත් මහතා සහ ශාන්ති චන්ද්‍රසේන මහත්මිය නඩුවේ දෙවැනි විත්තිකාර ශාන්ති චන්ද්‍රසේන මහත්මියට රජයෙන් නිල වාහනයක් දී ඇති බවට පැමිණිකාර අල්ලස් කොමිසම කිසිඳු ලියවිල්ලක් හෝ සාක්කියක් අධිකරණයට ඉදිරිපත් කර නැති බවත් ඇයට ඉන්ධන දීමනාවක් හෝ දුන් බවට අල්ලස් කොමිසම සාක්කි ඉදිරිපත් කර නැති බවත් සඳහන් කර ඇත.
ශාන්ති චන්ද්‍රසේන මහත්මියට ඉන්ධන දීමනාවක් දුන් බව හෝ කේ.සී. 1335 දරණ වාහනයට ඉන්ධන ලබාගත් බවට කිසිඳු ඇණවුම් වව්චර්පතක් පැමිණිල්ලෙන් ඉදිරිපත් කර නැති බව අභියාචනයේ සඳහන් කරන පෙත්සම්කරුවෝ මේ සම්බන්ධයෙන් ඉදිරිපත් වු කිසඳු කරුණක් පිළිබඳ මහාධිකරණ විනිසුරුවරයා තීන්දුව දීමේදී සැළකිල්ලට ගෙන නැතැයි පෙන්වා දෙති.
චෝදනා වල සඳහන් වැරදි කිරීමට පළමු විත්තිකාර උතුරුමැද පළාත් සභාවේ හිටපු මහ ඇමති එස්.එම්. රංජිත් සමරකෝන් මහතා ආධාර අනුබල දුන් බවට හෝ විත්තිකරුවන් රජයට පාඩු කළ බවට පැමිණිල්ලෙන් ඔප්පු කර නැතැයිද දේශපාලන උවමනාවන් මත පැමිණිල්ල කල බවට පැමිණිලිකරුගේ සාක්කි වලින් හෙළි වු කරුණු පිළිබඳව හෝ විනිසුරුවරයා සැළකිල්ල දක්වා නැතැයිද පෙන්වා දෙන පෙත්සම්කරුවෝ මහාධිකරණ විනසසුරුවරයාගේ දෝෂ සහගත තීන්දුව ඉවත දමා තමන් සිය`ථ චෝදනා වලින් නිදොස් කර නිදහස් කරන්නැයි ඉල්ලා සිටිති.
