චීනයේ ශිෂුවාන් විශ්ව විද්‍යාලයේ ආදි විද්‍යාර්ථයකු (ආචාර්ය උපාධිදරයකු) වූ සංචාරක නියෝජ්‍ය අමාත්‍ය රුවන් රණසිංහ මහතා එම විශ්වවිද්‍යාලයේ ගෞරව මහාචාර්ය ධූරයකින් පසුගියදා පිදුම් ලැබීය.
මෙම උත්සවය සංවිධානය කර තිබුණේ ශිෂුවාන් විශ්ව විද්‍යාලීය ඉතිහාස සහ සංස්කෘතික අධ්‍යයන අංශය මගිනි. තම විශ්ව විද්‍යාලයේ අධ්‍යයන කටයුතු නිමකළ විදේශීය ශිෂ්‍යයෙකු ප්‍රථම වරට සංචාරක නියෝජ්‍ය අමාත්‍ය ධුරයකට පත්වීම පිළිබඳ සුභපැතුම් පිරිනමමින් සහ සංචාරක පාරිසරික සංස්කෘතික සහ සංවර්ධන ක්ෂේත්‍රයන් විෂයෙහි ඒ මහතා කරන ලද සේවය උදෙසා මෙම විශේෂ සම්මානයට පාත්‍ර විය.
2017 වර්ෂයේ සිය ආචාර්ය උපාධිය සම්පූර්ණ කළ රුවන් රණසිංහ මහතා ඌව වෙල්ලස්ස විශ්ව විද්‍යාලයේ සංචාරක අධ්‍යයන අංශය ආරම්භයේදී ප්‍රථම අංශ ප්‍රධාන මහාචාර්යවරයා ලෙසද, නව රජයේ නියෝජ්‍ය අමාත්‍ය ධුරය භාරගන්නා තෙක්ම සරසවියේ කළමනාකරණ පීඨයේ පීඨාධිපති ලෙසද කටයුතු කළේය.
ශිෂුවාන් විශ්ව විද්‍යාලයේ පාලක කමිටුව මෙම මහාචාර්ය පදවිය පිරිනමිමන් සඳහන් කළේ මෙය හුදෙක් රුවන් රණසිංහ මහතා සම්මානයට පාත්‍ර කිරීමක් පමණක් නොවන බවත්, දෙරට අතර පවතින ජාත්‍යන්ත්‍රික මිතුදම තවත් ශක්තිමත් කිරීම සඳහා වන චීනයේ කැපවීම තවදුරටත් ඉස්මතු කරන සුවිශේෂී අවස්ථාවක් වන බවත්ය.
ශ්‍රී ලාංකීය සංචාරක ක්ෂේත්‍රයේ සංවර්ධනය , තිරසාර සංකල්පයන්ට අනුකූලව නව මාවතක් ඔස්සේ ඉදිරියට ගෙන යෑමට මහාචාර්ය රුවන් රණසිංහ මහතාට ඉතා විශාල වගකීමක් හිමි වන බව උත්සවය අමතමින් චීනරජයේ පාලක පක්ෂ කමිටුවේ නියෝජ්‍ය ලේකම් Li Zheng chiමහතා පැවසීය . මෙම උත්සව අවස්ථාව සඳහා පාලක පක්ෂ සහ විශ්ව විද්‍යාල කටයුතු ආයතනයේ අධ්‍යක්ෂ Liao Yu මහතා සමග ජාත්‍යන්තරය කටයුතු අංශයේ අධ්‍යක්ෂ Li Zhiqiangමහතා සහ ශිෂුවාන් විශ්ව විද්‍යාලයේ ඉතිහාස සහ සංස්කෘතික අධ්‍යයන අංශයේ පීඨාධිපති Lv H ongliangමහතා ඇතුළු දෙරටේම ප්‍රධාන පෙළේ දූත පිරිසක් සහභාගී විය.
ශිෂුවාන් සරසවිය ලොව පිළිගත් විශ්ව විද්‍යාල 100 අතරේ සිය කීර්ති නාමය හොබවන අතර චීනයේ ප්‍රධාන සරසවි 03 අතර ස්ථානගතවෙයි. මෙම විශේෂ අවස්ථාවෙන් අනතුරුව නියෝජ්‍ය අමාත්‍ය මහාචාර්ය රුවන් රණසිංහ මහතා එම විශ්ව විද්‍යාලයේ අධ්‍යාපනය ලබන ශ්‍රී ලාංකීය ශිෂ්‍ය ශිෂ්‍යාවන් සමඟ විශේෂ සාකච්ඡාවකට ද සහභාගි විය.
