දසවැනි පාර්ලිමේන්තුව සඳහා ශ්‍රී ලංකා – ජර්මානු පාර්ලිමේන්තු මිත්‍රත්ව සංගමයේ සභාපති ධුරයට අධිකරණ හා ජාතික ඒකාබද්ධතා අමාත්‍ය නීතිඥ හර්ෂණ නානායක්කාර මහතා තේරී පත් විය. මෙම සංගමය දසවැනි පාර්ලිමේන්තුව සඳහා ස්ථාපිත කිරීමේ රැස්වීම කථානායක වෛද්‍ය ජගත් වික්‍රමරත්න මහතාගේ ප්‍රධානත්වයෙන් පැවැත්විණි.
එම රැස්වීමේදී, ශ්‍රී ලංකා – ජර්මානු පාර්ලිමේන්තු මිත්‍රත්ව සංගමයේ ලේකම් ධුරයට පාර්ලිමේන්තු මන්ත්‍රීනී නීතිඥ චමින්ද්‍රානි කිරිඇල්ල මහත්මිය තේරී පත් වූවාය.
රැස්වීම අමතමින් කථානායකවරයා සඳහන් කළේ, ජර්මනිය දිගු කලක සිට ශ්‍රී ලංකාවේ වටිනා සංවර්ධන හවුල්කරුවෙකු ලෙස, සංහිඳියාව, පෞද්ගලික අංශයේ සංවර්ධනය, සාමය ගොඩනැගීම සහ අධ්‍යාපනය වැනි ක්ෂේත්‍රවල විශාල සහයෝගයක් ලබා දෙන බවයි. දෙරට අතර පවතින දිගු කාලීන සහයෝගීතාව ඔහුගේ ප්‍රශංසාවට ලක්විය.
මෙහිදී අදහස් දක්වමින් අභිනව සභාපති අමාත්‍ය නීතිඥ හර්ෂණ නානායක්කාර මහතා කීවේ දෙරටෙහි ව්‍යවස්ථාදායකයන් අතර සම්බන්ධතාවය ශක්තිමත් කිරීම සඳහා මෙම සංගමය හරහා වැදගත් කාර්යභාරයක් ඉටු කිරීමට හැකිවනු ඇති බවයි.
